පසුගියදා මාධ්ය විසින් වාර්තා කර තිබුන ආකාරයට, බුද්ධි අංශ පිලිබඳ වර්තමාන ආරක්ෂක ලේකම් ගෝඨාභය රාජපක්ෂගේ මතය වන්නේ, එම අංශ සාම කාලයෙදීත් වැදගත්ය යන්නයි.
එය ඔහු විසින් ඉදිරිපත් කෙරෙන්නේ ජාතික සීමාවෙන් පරිබාහිරව අපේක්ෂිත අභියෝගයන් සැලකිල්ලට ගෙනයැයි උපකල්පනය කළහොත්, පැන නගින ගැටලුව වන, එම අභියෝගයන් අරභයා “ස්වයං ක්රියාකාරී අවිගත් කණ්ඩායමක” ක්රියාකාරිත්වය යෝග්ය නොවේද යන ප්රශ්නයට පිළිතුරු සෙවීමේදී සාක්ෂාත් වන ස්වයං අවබෝධය වන්නේ, - පිළිතුර “නොවේ” යන්න බැවින්- රාජ්ය විසින් ජාතික සීමාව තුල ගොනු කෙරුණු ප්රජාව සැලකු විට එහි සමස්තයේ හෝ අඩුම තරමේ බහුතරයේ අවශ්යතාවය, හිර ගෙවල් සහ අනෙකුත් ආයතන තම අණසක යටතට ගෙන සිටින විශේෂ මණ්ඩල වලට අයත් සන්නාහ සන්නද්ධ පුද්ගලයන්ගෙන් නිර්මිත, රාජ්යය මගින්, නියෝජනය නොවන බවයි.මෙම ස්වයං අවබෝධයේ වලංගුභාවය, එය සාක්ෂාත් කරගැනීම කරා මෙහෙයවන ප්රශ්නයෙහි නිමිත්ත, ජාතික සීමාව තුලට විතැන් වූ අවස්තාවේදී සැලකූ විටද, අහෝසි වීමකට ලක් නොවේ.ඒ හැරුණු විට රාජ්යය සමන්විත මර්ධනකාරී ව්යුහයක අකාලික වැදගත්කම දක්වන, රාජ්යය නියෝජනය කරන පුද්ගලයකු වශයෙන් ගෝඨාභය රාජපක්ෂගේ මෙම අදහස් දැක්වීම, මර්ධනය රාජ්යයේ අකාලික අවශ්යතාවක් බව සනාථ කරයි.
රාජ්යය පිලිබඳ මාක්ස්වාදී ස්ථාවරය සැලකූවිට එමගින් ප්රකාශිත අදහස වන්නේද රාජ්යය සමස්තය නියෝජනහිලා අසමත් සහ මර්ධනකාරී ප්රපංචයක් වන බවය.
“..විසඳිය නොහැකි සේ සමාජය ප්රතිවිරෝධී පන්ති වලට බිඳී ගොස් තිබෙය යන ප්රධාන මතය හා මූලික අදහස අඳුරු කරවමින් සාමන්ය මිනිසාගේ සිත මනහර ලෙස අන් අතකට යොමු කරවීම පිණිස කරන එවැනි ප්රකාශනයක් “විද්යාත්මක” ලෙස පෙනේ.
මෙවැනි භේදයක් නොතිබුනුනම් දඬු වන්න මිලේච්ඡ මිනිසුන් සමූහයකින් හෝ එසේත් නැත්නම් ගෝත්ර සාමාජ සංවිධානයකින් හෝ “ස්වයං ක්රියාකාරී අවිගත් ජනතා සංවිධානය” උසස් වන්නේ සිය සංකීර්ණ බව හා උසස් ශිල්ප ඥානය ආදිය නිසාය. එහෙත් එවැනි සංවිධානයක් තවමත් ඇතිවිය හැක.
එහෙත් එවැනි සංවිධානයක් ඇතිවීම නොහැකි වන්නේ සභ්ය සමාජය සතුරු ලෙස භේදවී යාම සහ සමාදාන කල නොහැකි සේ සතුරු පන්ති වලට බෙදී යාමත් නිසා “ස්වයං ක්රියාකාරී” අවි ගැනීමකින් ඔවුන් අතර අවිගත් සටන් පැතිර යාමට ඉඩ කඩ ඇතිවිය හැකි බැවිනි. රජයක් ඇතිවීම සමග විශේෂ බලයක් නිර්මාණය වෙයි,අවිගත් මිනිසුන්ගේ විශේෂ හමුදා ඇතිවෙයි. තමන්ට සේවය කරන අවිගත් මිනිසුන්ගෙන් යුත් විශේෂ සංවිධාන සෑදීමට පන්තිය යත්න දරන සැටිත්, මර්ධනයට ගොදුරුවී සිටින සූරාකන්නන්ට සේවය නොකරන, සූරා කණු ලබන්නන්ට සේවය කරන, අලුත් පන්නයේ සංවිධානයක් සෑදීමට යත්න දරන සැටිත් රාජ්ය යන්ත්රය සුනු විසුනු කරමින් සෑම විප්ලවයක්ම අපට පැහැදිලිව පෙන්වයි.”
(රජය හා විප්ලවය - ලෙනින්)
මෙහිදී ගෝඨාභයගේ ප්රකාශයෙන් ආවරණය නොකෙරෙන රාජ්ය පිලිබඳ මාක්ස්වාදී ස්ථාවරයේ රාජ්යය නියෝජනය කරන සමාජ ස්ථරයේ අනන්යතාවය ආදී කොටස් සනාථ කිරීම, කටුනායකදී රොශාන චානක ඝාතනය, හලාවත ඇන්ටනී ඝාතනය, රතුපස්වල සිදුවීම ආදී සිදුවීම් තුල රාජ්යයයේ භාවිතයෙන් එම ප්රකාශයට පෙරම සනාථ කොට ඇත. එබැවින්, ගෝඨාභයගේ උක්ත අදහස් දැක්වීම, රාජ්යය පිලිබඳ මාක්ස්වාදී ස්ථාවරය තහවුරු කිරීමක් ලෙස සැලකිය හැක.
-ප්රගාමී ව්යාපාරය.
